• Srijeda, 15. oktobar 2025.
Novo prvenstvo, nazvano Total Chess World Championship Tour, sastojaće se od četiri događaja godišnje i krunisaće ukupnog šampiona u tri discipline – Fast Classic, Rapid i Blitz šahu.
„Očekujemo da će ovo postati jedan od najprestižnijih događaja u cijelom šahovskom kalendaru“, izjavio je Šel Madland (Kjell Madland), direktor Norway Chess-a i novog prvenstva.
Glavne tačke:
- Novi format Svjetskog prvenstva u šahu, koji organizuje Norway Chess, zvanično je odobren od strane Međunarodne šahovske federacije (FIDE).
- Total Chess World Championship Tour će krunisati ukupnog šampiona kroz tri discipline: Fast Classic, Rapid i Blitz. Pobjednik će nositi titulu FIDE Svjetski kombinovani šampion.
- Turneja će se sastojati od četiri turnira godišnje u raznim gradovima širom svijeta.
- Minimalni nagradni fond od 2.7 miliona dolara godišnje (750.000 $ po događaju za prva tri turnira, 450.000 $ za finale), plus bonusi za učinak.
- Pilot turnir planiran je za jesen 2026. godine, a prva puna sezona kreće 2027.
Inicijativa dolazi od organizatora prestižnog turnira Norway Chess, a zvanični sporazum o statusu Svjetskog prvenstva potpisan je sa FIDE-om početkom oktobra. Vizija turneje Total Chess World Championship Tour jeste da pronađe igrača koji najbolje vlada kombinacijom disciplina: Fast Classic, Rapid i Blitz.
Fast Classic je inovacija klasičnog šaha, sa vremenskim ograničenjem od 45 minuta po igraču, uz dodatak od 30 sekundi po potezu. Iako je brži, partije će biti rejtingovane kao klasične.
„Tražimo ‘Total Chess Player-a’ – svestranog, taktički inteligentnog i tehnički vještog sportistu koji se lako prilagođava različitim vremenskim kontrolama“, kaže Madland.
Turneja će se održavati u različitim gradovima širom svijeta, a tokom finalnog događaja biće krunisan ukupni pobjednik – zvanični FIDE Svjetski Kombinovani Šampion. Pilot turnir biće održan u jesen 2026., kao test formata, dok će prva zvanična sezona uslijediti 2027.
„Želimo da stvorimo zabavan turnir koristeći najsavremeniju tehnologiju, inovativne i atraktivne TV i striming prenose, i brže formate kako bismo šah približili široj publici više nego ikad prije. Očekujemo da će ovo postati jedan od najprestižnijih događaja u šahovskom kalendaru. Ponosni smo na povjerenje koje nam je FIDE ukazao. Od samog početka, FIDE je bio aktivan i angažovan partner – vodeći računa da projekat bude u skladu sa vizijom i standardima FIDE-a. Zahvaljujemo im se, posebno predsjedniku FIDE-a, na njihovoj podršci“, izjavio je Madland.
Nagradni fond i bonusi
Total Chess World Championship Tour ima značajan nagradni fond:
- Minimum 750.000 dolara za svaki od prva tri turnira.
- Finale, gdje se kruniše FIDE Svjetski kombinovani šampion, nosi nagradu od najmanje 450.000 dolara za četvoro finalista.
- Dodatni bonusi za najviše osvojenih poena po turniru i za ukupan skor na turneji.
„Za navijače“
Predsjednik FIDE-a, Arkadij Dvorkovič, izrazio je snažnu podršku ovoj inicijativi:
„Uvijek tražimo načine da inoviramo i pomjeramo granice onoga što šah može biti. Iako je šah već jedan od najpopularnijih igara na svijetu, njegov potencijal za rast je ogroman. Sa Total Chess World Championship Tour-om igračima dajemo novu titulu za koju se mogu boriti, a publici brži turnirski format. Nadamo se da će turnir privući i stare i nove fanove.“
„Ovo vidimo kao sjajan dodatak tradicionalnom i prestižnom Svjetskom prvenstvu u klasičnom šahu, gdje se kruniše neprikosnoveni šampion. Prvenstva će se međusobno dopunjavati i pružiti još više uzbuđenja navijačima. Ovo nije kratkoročna inicijativa, već dugoročni dogovor između FIDE-a i Norway Chess-a“, dodao je Dvorkovič.
Norway Chess sada poziva potencijalne gradove domaćine, investitore i partnere da se uključe u razgovore o priključenju projektu Total Chess World Championship.
Činjenice o Norway Chess-u:
- Osnovan 2013. godine, Norway Chess je brzo postao sastavni dio elitnog šahovskog kalendara.
- Smatra se jednim od najprestižnijih i najinovativnijih međunarodnih šahovskih turnira.
- Doprinosi profesionalizaciji šaha, tretirajući ga kao savremeni sport i komercijalno održiv proizvod.
- Norway Chess je prvi na svijetu uveo turnir za žene sa nagradnim fondom jednakim onom u otvorenim kategorijama.
Činjenice o FIDE-u:
- Međunarodna šahovska federacija (FIDE) je krovno tijelo šahovskog sporta i reguliše sve međunarodne šahovske turnire.
- Međunarodni olimpijski komitet priznao je FIDE 1999. godine kao globalnu sportsku organizaciju.
- Osnovana je 1924. godine u Parizu, pod motom „Gens una sumus“ (latinski: „Jedna smo porodica“), kao jedna od prvih međunarodnih sportskih federacija, zajedno sa organizacijama koje upravljaju fudbalom, kriketom, plivanjem i auto-trkama.
- Danas okuplja 201 zemlju članicu, u obliku nacionalnih šahovskih federacija.
https://www.fide.com/norway-chess-launches-new-world-championship-approved-by-fide/